Canllaw i apeliadau cyllido torfol
Trosolwg
- Pam codi arian ar-lein?
- Beth yw apêl cyllido torfol?
- Platfformau cyllido torfol
- Pam cyllido torfol?
- Targed codi arian
- Cynllunio
- Awgrymiadau da
- Dechrau da
- Awgrymiadau ar gyfer y cyfryngau cymdeithasol
- Yn y cyfamser
- Codi arian yn y dyfodol
- Templed cynllunio ymgyrch cyllido torfol
Pam codi arian ar-lein?
Mae rhoi ar-lein yn gyflym ac yn hawdd i’w wneud, ac mae rhoddion ar-lein ddwywaith cymaint â rhoddion all-lein ar gyfartaledd.
Beth yw apêl cyllido torfol?
Ymgyrch (ar-lein fel arfer) sy’n canolbwyntio ar fater penodol, dros gyfnod penodol, a hynny ar frys. Maen nhw’n canolbwyntio ar gael llawer o roddion bach gan lawer o bobl yn hytrach nag ychydig o roddion mawr. Fel arfer, maen nhw’n defnyddio platfformau arbenigol i reoli a hyrwyddo’ch ymgyrch.
Mae dau fath sylfaenol o apêl cyllido torfol:
“Popeth-neu-ddim”
Dim ond os byddwch chi’n cyrraedd eich targed codi arian neu’n rhagori arno y byddwch chi’n cadw’r arian. Os na fyddwch chi’n cyrraedd y nod, caiff yr holl gyfraniadau eu dychwelyd at y rhoddwyr. Mantais hyn yw ei fod yn creu ymdeimlad o frys ac yn annog cefnogwyr i fynd ati i hyrwyddo’r ymgyrch.
Cadw-beth-rydych-chi’n-ei-godi
Byddwch chi’n cadw’r holl arian sy’n cael ei godi ni waeth a fyddwch chi wedi cyrraedd y targed ai peidio. Mae’r rhain fel arfer yn addas pan fydd pob ceiniog o gyllid yn helpu i symud y prosiect yn ei flaen. Mae llai o risg ynghlwm wrth y rhain gan y byddwch chi’n derbyn rhoddion hyd yn oed os na fyddwch chi’n cyrraedd y targed llawn.
Mae dewis rhwng yr opsiynau hyn yn dibynnu ar eich strategaeth codi arian, pa mor hyblyg yw nodau eich prosiect a pha mor gyflym y mae angen eu cyflawni.
Platfformau cyllido torfol
Mae yna lawer o wahanol blatfformau a all reoli eich ymgyrch. Bydd y rhain yn ei gwneud hi’n haws i ddarpar gefnogwyr ddod o hyd i’ch ymgyrch, yn ogystal â helpu i olrhain cynnydd a rheoli’r gwaith o gasglu rhoddion. Fodd bynnag, codir tâl am hyn, a all gynnwys ffi benodol, ynghyd â chanran o’r swm a godir. Gyda chynifer o wahanol blatfformau ar gael, gallwch chi siopa o gwmpas i ddod o hyd i’r un sydd fwyaf addas i chi. Mae Shopify, er enghraifft, yn darparu canllaw i’r 10 safle cyllido torfol gorau yn y DU.
Mae CrowdSpace Directory yn cynnig cyfeiriadur cynhwysfawr o blatfformau cyllido torfol yn y DU sy’n eich galluogi i hidlo yn ôl math o fuddsoddiad, ffocws y diwydiant, a blynyddoedd ar y farchnad.
Mae Charity Digital wedi llunio rhestr o blatfformau, gan gynnwys adnodd cymharu prisiau y gellir ei lawrlwytho er mwyn helpu i wneud penderfyniadau.
Pam cyllido torfol?
Mae cyllido torfol yn codi 70% yn fwy mewn rhoddion na gweithgareddau codi arian. Maen nhw’n ennyn hyder pobl ac yn dryloyw ynglŷn â ble mae rhoddion yn mynd. Bydd 27% o roddwyr cyllido torfol yn mynd ymlaen i wirfoddoli dros yr achos a bydd 90% yn hyrwyddo’r prosiect.
Targed codi arian
Esboniwch yr angen, y gwaith a’r canlyniad y bydd cefnogaeth y rhoddwr yn ei gael yn glir. Pennwch darged o rhwng £500 a £5,000 ar gyfer apêl gyntaf er mwyn annog rhoddwyr lefel is a sicrhau gwell siawns o lwyddiant.
Mae’n bosibl sefydlu ymgyrch cyllido torfol yn gyflym iawn; fodd bynnag, i wneud hynny’n dda ac i fod yn llwyddiannus, bydd angen cynllunio a pharatoi’n drylwyr a threulio amser ar yr ymgyrch. Felly, er y bydd manteision cyhoeddusrwydd a chodi ymwybyddiaeth ychwanegol o’ch ymgyrch, byddwch yn ymwybodol o gost/budd yr hyn rydych chi’n ei gynllunio i sicrhau eich bod chi’n gwneud y defnydd gorau o’ch amser a’ch adnoddau.
Wrth chwilio am blatfform i’w ddefnyddio, mae’r hyn i’w ystyried yn cynnwys y ffioedd a godir, a ydyn nhw’n casglu Rhodd Cymorth, a ydyn nhw’n canolbwyntio ar genre penodol (celf, technoleg, lles ac ati), cyrhaeddiad
| Platfform | Poblogrwydd a ffocws | Pa mor hawdd yw ei ddefnyddio? | Yn cefnogi rhodd cymorth? | Model ariannu |
| JustGiving | Platfform blaenllaw yn y DU ar gyfer achosion elusennol, wedi codi dros £4 biliwn ers 2001. | Hawdd ei ddefnyddio ac mae’n hawdd creu a rhannu ymgyrchoedd. | Ydy – Mae’n cefnogi Rhodd Cymorth yn awtomatig. | Cadw-Beth-Rydych- Chi’n-Ei-Godi |
| GoFundMe | Platfform sy’n cael ei gydnabod yn fyd-eang ar gyfer codi arian yn bersonol ac ar gyfer elusennau. | Yn reddfol i’w osod, rhannu cymdeithasol yn gryf. | Na – Rhaid hawlio Rhodd Cymorth ar wahân. | Cadw-Beth-Rydych- Chi’n-Ei-Godi |
| Crowdfunder UK | Poblogaidd ar gyfer prosiectau cymunedol a mentrau cymdeithasol yn y DU. | Hawdd ei osod, adnoddau ar gyfer llwyddiant ymgyrchoedd. | Ydy – Mae’n cefnogi Rhodd Cymorth ar gyfer elusennau cymwys. | Dewisiadau Popeth-neu-Ddim a Cadw-Beth-Rydych-Chi’n-Ei-Godi |
| Kickstarter | Yn adnabyddus am brosiectau creadigol; presenoldeb rhyngwladol cryf. | Canllawiau cynhwysfawr a chefnogaeth ar gyfer prosiectau. | Na – Mentrau creadigol yn bennaf. | Popeth-neu-Ddim |
Indiegogo | Yn canolbwyntio ar brosiectau creadigol ac entrepreneuraidd; cyrhaeddiad byd-eang. | Offer ymgyrchu hyblyg a nodweddion hyrwyddo. | Na – Mae defnyddwyr yn ei drin yn annibynnol. | Dewisiadau Popeth- Neu-Ddim a Cadw-Beth-Rydych-Chi’n-Ei-Godi |
| Crowdcube | Platfform cyllido torfol ecwiti blaenllaw yn y DU ar gyfer buddsoddi mewn busnesau. | Canllawiau manwl ar gyfer cyflwyniadau buddsoddi. | Amherthnasol – Buddsoddiadau ecwiti. | Popeth- Neu-Ddim (Buddsoddiad ecwiti) |
Cynllunio
Paratowch staff, gwirfoddolwyr ac ymddiriedolwyr i gymryd rhan. Ystyriwch lansio o gwmpas dyddiad pwysig i gynnal momentwm a gwnewch fideo sy’n crynhoi’r apêl. Cynhaliwch yr apêl am 3 wythnos i 3 mis i gadw ymdeimlad o frys. Cynlluniwch eich ymgyrch cyn i chi lansio, gan gynnwys hysbysiad o’r ymgyrch ymlaen llaw cyn iddi gael ei lansio i sicrhau ei bod yn denu cefnogaeth yn gyflym; a hefyd, sut y bydd yr ymgyrch yn cael ei hyrwyddo ar-lein/all-lein, a phryd y byddwch chi’n rhoi’r wybodaeth ddiweddaraf ar gynnydd.
Gall cynnwys fideos a delweddau wella llwyddiant eich ymgyrch yn sylweddol. Mae astudiaethau amrywiol wedi dangos y bydd ymgyrchoedd sy’n cynnwys fideo yn codi 100% yn fwy na’r rhai heb fideo a gall delweddau o ansawdd da gynyddu’r rhoddion 40%
Awgrymiadau da
Er bod llawer o bethau yn gallu dylanwadu ar lwyddiant eich ymgyrch, dyma bump o’r pethau allweddol i’w gwneud yn gywir:
Adrodd stori gymhellol – Ewch ati i gyfathrebu eich achos, pwy mae’n helpu, a pham mae’n bwysig yn glir. Mae cynnwys angerddol yn annog rhoddion.
Gosod nodau a gwobrau realistig – Dewiswch darged cyraeddadwy a gwobrau deniadol i ysgogi rhoddwyr ar wahanol lefelau o gyfraniadau.
Ymgysylltu’n rheolaidd – Rhowch ddiweddariadau rheolaidd i gefnogwyr am gynnydd, cerrig milltir a straeon i gynnal momentwm a chyfranogiad.
Defnyddio deunydd gweledol – Ewch ati i gynnwys lluniau a fideos o ansawdd uchel i hybu ymgysylliad a chreu cysylltiad emosiynol cryf.
Manteisio i’r eithaf ar rwydweithiau cyfryngau cymdeithasol – Defnyddiwch eich sianeli cymdeithasol presennol, gan ymgysylltu â dylanwadwyr lleol, ac annog cefnogwyr i rannu’n eang.
Mae llawer o blatfformau cyllido torfol yn galluogi/gofyn i chi roi gwobr i bobl sy’n cyfrannu at yr ymgyrch. Gall hyn amrywio o e-bost diolch i wahoddiad i ddigwyddiad lansio neu rodd fel crys-T. Sicrhewch nad yw cost unrhyw wobr yn fwy na’r rhodd.
Dyma rai enghreifftiau o wobrau y gallai ymgyrch cyllido torfol eu cynnig ar wahanol lefelau o gefnogaeth:
- £10 – Neges o ddiolch ar y cyfryngau cymdeithasol – Postiad yn diolch i’r rhoddwr yn bersonol neu gyfeiriad at y gefnogaeth mae wedi’i rhoi ar eich platfformau cyfryngau cymdeithasol.
- £25 – Pecyn cefnogwyr – Anfon cerdyn, sticer neu fathodyn diolch wedi’i frandio yn uniongyrchol at y cefnogwr i gydnabod ei gyfraniad
- £50 – Gwahoddiad arbennig i ddigwyddiad – Gwahoddiad i ddigwyddiad arbennig, gweithdy, neu daith y tu ôl i’r llenni sy’n gysylltiedig â gwaith eich elusen.
- £100+ – Cydnabyddiaeth amlwg – Enw’r rhoddwr yn ymddangos mewn man amlwg ar eich gwefan, cylchlythyr, neu adroddiad blynyddol fel cefnogwr allweddol, ynghyd â’r holl wobrau blaenorol.
Dechrau da
Unwaith y bydd apêl cyllido torfol yn cyrraedd 30% o’i tharged, mae’n llawer mwy tebygol o lwyddo ac mae’n annog rhoddwyr newydd. Symudwch oddi ar £0 yn gyflym trwy ychwanegu rhoddion all-lein (arian parod/grantiau) at y cyfanswm. Gallwch chi ddweud wrth gefnogwyr agos, ‘dim pwysau o gwbl ond, os oeddech chi’n bwriadu cyfrannu, yna byddai’n annog rhoddwyr newydd pe gallen ni, gyda’n gilydd, roi hwb i’r apêl a symud oddi ar £0 cyn ein lansiad cyhoeddus yr wythnos nesaf’.
Wrth i’ch ymgyrch fynd rhagddi, rhowch y diweddaraf i’ch cefnogwyr ar faint sy’n cael ei godi, pa effaith y bydd yr arian hwn yn ei chael a beth fydd codi mwy o arian yn ei wneud. Gallwch chi hefyd awgrymu ffyrdd y gallan nhw helpu eich ymgyrch, fel ei rhannu gyda’u rhwydweithiau cymdeithasol.
Awgrymiadau ar gyfer y cyfryngau cymdeithasol
Mae’r cyfryngau cymdeithasol yn offeryn hanfodol ar gyfer cynnal ymgyrch cyllido torfol lwyddiannus. Isod mae rhai awgrymiadau syml i’ch helpu chi i’w defnyddio’n effeithiol.
Postiadau adrodd straeon – creu a rhannu straeon byr, cymhellol neu fideos am unigolion a fydd yn elwa’n uniongyrchol ar yr ymgyrch.
Cyfri’r dyddiau tan y diwrnod lansio – creu cyffro ac ymdeimlad o frys trwy bostio negeseuon atgoffa dyddiol yn cyfri’r diwrnodau.
Ymgysylltu â dylanwadwyr – tagio neu ymgysylltu â dylanwadwyr neu gefnogwyr lleol er mwyn helpu i rannu eich neges â chynulleidfa ehangach.
Defnyddio delweddau – creu graffeg, ffeithluniau, neu fideos byr apelgar sy’n tynnu sylw at nodau neu gyflawniadau allweddol yr ymgyrch.
Rhoi’r wybodaeth ddiweddaraf yn gyson – rhoi’r wybodaeth ddiweddaraf i gefnogwyr am gynnydd eich ymgyrch yn rheolaidd, gan rannu cerrig milltir a llwyddiannau i gynnal momentwm.
Cynnwys rhyngweithiol – gallwch chi geisio defnyddio polau, sesiynau holi ac ateb, neu hyd yn oed sesiynau byw i ryngweithio â dilynwyr, gan sicrhau mwy o ymgysylltiad a gwelededd.
Hashnod y gellir ei rannu – creu #hashnod unigryw, hawdd ei gofio i annog rhannu ac olrhain ar draws platfformau cyfryngau cymdeithasol.
Galwadau i weithredu – cynnwys dolenni a galwadau uniongyrchol i roi, rhannu neu gefnogi yn glir ac yn rheolaidd. Mae hwn yn gam pwysig iawn, ond mae’n un sy’n cael ei hepgor yn aml hefyd!
Yn y cyfamser
Cofiwch ddiolch i roddwyr bob amser, gan eu hysgogi i gyfranogi ymhellach a gofyn iddyn nhw bostio ar eu cyfryngau cymdeithasol. Gall cyllido torfol helpu i sicrhau grantiau, cyllid cyfatebol neu nawdd corfforaethol. Gallai tudalennau codi arian o’u mentrau eu hunain fwydo i mewn i’ch targed cyllido torfol hefyd.
Codi arian yn y dyfodol
Cynlluniwch un neu ddwy ymgyrch y flwyddyn yn dibynnu ar angen, amser, yr hyn sy’n briodol a’ch gallu i roi’r sylw angenrheidiol i’r gwaith. Mae hyn yn amrywio’r ‘gofyniad’ codi arian, yn rhoi ffocws i ymdrechion ac yn caniatáu ar gyfer dysgu. Os cynhelir gormod o ymgyrchoedd, mae risg y bydd cefnogwyr yn diflasu. Bydd yr ymgyrchoedd hynny hefyd yn defnyddio llawer o syniadau ac egni o fewn y mudiad. Os byddwch chi’n lansio ymgyrchoedd byth a beunydd, efallai y bydd yn tarfu ar negeseuon eraill rydych chi’n ceisio eu rhannu a gallai hyd yn oed beri i bobl beidio â chefnogi.
Templed cynllunio ymgyrch cyllido torfol
1.Trosolwg o’r ymgyrch
- Teitl: Cegin Gymunedol Helping Hands
- Nod (£): £5,000
- Hyd yr ymgyrch: 1 Mai 2025 – 30 Mehefin 2025
2. Amcan
- Bydd yr arian yn helpu i sefydlu cegin gymunedol a fydd yn darparu prydau maethlon am ddim i deuluoedd agored i niwed ac unigolion sy’n wynebu tlodi bwyd yn ein cymuned.
3. Cynulleidfa darged
- Trigolion cymunedau lleol, teuluoedd, busnesau, ac unigolion sy’n meddu ar ymwybyddiaeth gymdeithasol.
- Bydd yr ymgyrch yn bwysig iddyn nhw oherwydd ei bod yn cefnogi cymdogion mewn angen, yn gwella llesiant cymunedol ac yn meithrin undod cymdeithasol.
4. Dewis platfform
- JustGiving – oherwydd ei boblogrwydd yn y DU, y ffaith bod modd rhoi Rhodd Cymorth yn awtomatig, ac offer hwylus i’w rhannu ar y cyfryngau cymdeithasol.
5. Cynllun gwobrwyo
- £10 | Neges i ddiolch i rywun yn bersonol ar y cyfryngau cymdeithasol
- £25 | Bathodyn cefnogwr a cherdyn diolch
- £50 | Gwahoddiad i ddigwyddiad agoriadol y Gegin Gymunedol
- £100+ | Enw’r rhoddwr yn cael ei osod ar wal cefnogwyr y gegin gymunedol a chydnabyddiaeth ar-lein
6. Negeseuon yr ymgyrch
- Neges allweddol: “Gyda’n gilydd, gadewch i ni faethu ein cymuned a brwydro yn erbyn tlodi bwyd.”
- Cysylltiad emosiynol: Rhannu straeon personol teuluoedd ac unigolion lleol a fydd yn elwa’n uniongyrchol ar yr ymgyrch.
7. Strategaeth marchnata a hyrwyddo
- Cynllun cyfryngau cymdeithasol: Rhoi’r wybodaeth ddiweddaraf yn wythnosol, straeon, fideos ar Facebook, Instagram, Twitter
- Ymgyrch e-bost: Rhoi’r wybodaeth ddiweddaraf bob pythefnos gan dynnu sylw at gerrig milltir a straeon
- Y wasg leol/ymgysylltu â’r cyfryngau: Datganiad i’r wasg a chyfweliadau gyda phapurau newydd a radio lleol
- Ymrwymiad dylanwadwyr neu lysgenhadon: Ymgysylltu â dylanwadwyr lleol ac arweinwyr cymunedol i ehangu negeseuon
8. Creu cynnwys
- Fideo(s) : Fideos byr sy’n tynnu sylw at straeon gan aelodau’r gymuned, yr angen, a’r effaith bosibl
- Lluniau: Ffotograffau sy’n dangos ymgysylltiad â’r gymuned, digwyddiadau dosbarthu prydau bwyd, a chymeradwyaeth
- Diweddariadau ysgrifenedig: Straeon a’r wybodaeth ddiweddaraf am gynnydd bob wythnos ar y dudalen cyllido torfol a’r cyfryngau cymdeithasol
9. Cyllideb
- Treuliau marchnata: £400
- Treuliau cynhyrchu (fideo/lluniau): £500
- Ffioedd platfform: £200
- Amrywiol: £150
10. Amserlen a cherrig milltir
- Gweithgareddau cyn lansio: Creu cynnwys hyrwyddo (Ebrill 2025)
- Dyddiad lansio’r ymgyrch: 1 Mai 2025
- Adolygiad canol yr ymgyrch: 30 Mai 2025
- Dyddiad gorffen yr ymgyrch: 30 Mehefin 2025
- Gwaith dilynol ar ôl yr ymgyrch: Dechrau Gorffennaf 2025
11. Gwerthuso a gwaith dilynol
- Sut bydd llwyddiant yn cael ei fesur: Cyflawni’r targed o £5,000, metrigau ymgysylltu ar y cyfryngau cymdeithasol, a phresenoldeb yn nigwyddiad agoriadol y gegin.
- Cynlluniau i ddiolch i roddwyr ac ymgysylltu â nhw ar ôl yr ymgyrch: Negeseuon yn diolch iddyn nhw’n bersonol, cydnabyddiaeth gyhoeddus ar y cyfryngau cymdeithasol, a gwahoddiadau i ddigwyddiadau cymunedol parhaus.
